Du 2 mars 1669.

Copié sur l’original en parchemin.

Extraict des registres de la chambre establye par le roy pour la reformation de la noblesse du pays et duché de Bretagne par lettres patentes de Sa Majesté du mois de janvier mil six cens soixante huict, verifiées en parlement.

Entre le procureur general du roy, demandeur d’une part, et dame Perronnelle de la Bouexiere, veuve de feu escuyer Jan Le Tresle, sieur et dame de Ꝃbernard, mere et tutrice et bienveillante d’escuyer Francois Le Tresle leur fils aisné ; et Pierre Le Tresle, escuyer puisné dudit Francois, deffendeur, d’autre part.

Veu par ladite Chambre les extraicts de comparutions faictes au greffe d’icelle Chambre les deux octobre mil six cens soixante huict, et vingt huictiesme febvrier, celluy de la dite dame Perronnelle de la Bouexiere ausd. qualitez contenant la declaration de maistre Pierre Joseph Bureau, son procureur, de voulloir pour ladite dame audit nom, soustenir la qualité d’escuyer par ledict deffunct sieur de la Bouexiere prise suivant les tiltres qu’en produiroit messire Louis de la Bourdonnaye, vicomte [folio 2v] de Coetion, lequel comme aisné estoit saizy d’iceux ; que ladite dame demeure en la ville de Guerrande, evesché de Nantes, et ressort dudit Guerrande ; et que lesdits Le Tresle, portent pour armes d’azur à un sine d’argent ; et celluy dudit Pierre Le Tresle, contenant la declaration dudit maistre Pierre Joseph Bureau, aussy procureur de Pierre Le Tresle, de maintenir la mesme qualité que pour sondit puisné de noble, escuyer, et se refferer aux tiltres qui seroient par luy produits avec l’escusson desdites armes.

Carte genealogique de l’ancienne maison et famille desdits deffendeurs, au frontispice de laquelle est l’escusson desdites armes.

D’azur au cygne d’argent.

Induction d’actes et pieces de ladicte dame Perronnelle de la Bouexiere en ladite qualité, fournye au procureur general du roy, deffendeur, le dix neufiesme febvrier dernier, par laquelle est dit que les autheurs de ses enfans sont dessendus en ligne collateralle et juveigneurie des seigneurs de Ꝃolland, dont la maison est sittuée sur la paroisse d’Erbignac, ressort de Guerrande, evesché de Nantes, que depuis ils se sont tousjours comportés noblement aussy bien que leurs ancestres et ceux de la ligne directe des [folio> 3] aisnez, a present tombée en quenouille, dont elle justiffie la qualité noble par les partages avantageux de tout temps establis en leur famille, bonnes alliances dans lesquelles ilz ont entré en possession de terres nobles ez temps ou il n’y avoit que les seuls nobles à en avoir la possession.

Extraicts d’antienne refformation de la chambre et enfin par tous les tiltres dont on peut prouver la qualité noble et par ainsy debvoir estre bien fondée à conclure à ce qu’en conséquence des actes induits justiffians la qualité dudit Le Tresle et le gouvernement noble de leurs ancestres, ils soint maintenus avecq leurs dessendans nez en loyal mariage en la qualité de nobles d’antienne extraction et d’escuyer par eux prises et leurs predecesseurs de tout temps immemorial, et à porter leurs escussons timbrez avecq les blasons de leurs dittes armes, et autres droicts et privilleges de noblesse comme les autres nobles d’antienne extraction de la province, et en consequence qu’il soit ordonné qu’ils seront inscripts au catalogue qui se fera pour les nobles en la jurisdiction royalle de Guerrande, sous le ressort de laquelle ils sont demeurans.

[folio 3v] Articulement de la filiation et genealogie desdits deffendeurs inserée dans leur induction, par lequel il conste que de noble escuyer Pierre Le Tresle, seigneur de Ꝃollan, desnommé comme noble en la refformation de la Chambre de mil quattre cens cinquante et trois, soubs la paroisse d’Herbignac, evesché de Nantes, où est située ladite maison noble de Ꝃollan, et de dame Jehanne de Mezuillac, sa compagne, fille de nobles homs Gilles de Mezuillac, seigneur de Ꝃallio, issue Jan Le Tresle premier du nom, seigneur de Ꝃollan, filz aisné herittier principal et noble, lequel espousa en premieres nopces Jehanne Guerre, fille du sieur de Langlermine, et en secondes Guillemette Sorel, fille du feu sieur du Bois de la Motte, que dudit premier mariage dudit Jan Le Tresle second du nom, seigneur de Ꝃollan, fils aisné, herittier principal et noble, que dudit Jehan second du nom et de Gillette Gaulart, sa compagne, herittiere de Vaudepierre en la parroisse d’Allair, issurent Jehan troiziesme du nom, seigneur de Ꝃollan, fils aisné, herittier principal et noble, [folio 4] et Jacques Le Tresle, sieur de Ꝃhauze, puisné, que dudit Jan troiziesme du nom, aisné herittier principal et noble, et de damoiselle Anne de la Besné, sa compagne, fille de Pierre de la Besné et Jacquette de Mareuil, sieur et dame de la Haye de Besné, issut Georges Le Tresle, seigneur de Ꝃollan, fils aisné herittier principal et noble qui espousa en premieres nopces Jeanne de Ꝃpoisson, fille de Hyerosme de Ꝃpoisson, et Guillemette de Cleux, sieur et dame de Trevengat, et en secondes nopces Renée de Forges, fille du sieur de la Ville Janvier, et de dame Françoise Sorel, duquel second mariage issurent Jacquemine et Renée Le Tresle, que dudit premier mariage issurent Jacques Le Tresle, seigneur de Ꝃollan, fils aisné, herittier principal et noble, et Marthe Le Tresle, mariée au sieur Fresne de Marbre, que dudit Jacques Le Tresle et de dame Renée de Trevelec, sa compagne, fille du deffunct sieur de Penhouet Trevelec, issut dame Louise Le Tresle, fille et unique herittiere, qui a espousé messire Louis de [folio 4v] la Bourdonnaye, seigneur vicomte de Coetion, conseiller en la Cour, que dudit Jacques Le Tresle, sieur de Ꝃaudré, fils puisné dudit Jan Le Tresle, second du nom, et de ladite Gaulard, et frere juveigneur dudit Jehan troisiesme issut, et de dame Françoise de la Haye sa compagne, fille du sieur de la Bousselaye, issut Marc Le Tresle, fils aisné heritier principal et noble, qui espousa Claude de Ꝃpoisson, fille du sieur de Ꝃfesour, que de ce mariage issut Jan Le Tresle, fils aisné herittier principal et noble, duquel et de ladite dame Perronnelle de la Bouexiere de la maison de Bratoune sont issus lesdits Francois Le Tresle, fils aisné heritier principal et noble, et Pierre Le Tresle son frere puisné, et ce qui a esté mis vers ladite Chambre pour le soustien de la susdite filiation et qualité au desir de la susditte induction.

Requeste dudit sieur Pierre Le Tresle, puisné dudit escuyer François Le Tresle, sieur de Ꝃbernard, tendante pour les causes y contenues à ce qu’il pleust [folio 5] a laditte Chambre voir la susdite declaration, et en conséquence joint la declaration de se refferer aux tiltres par son dit aisné produits, joindre la requeste à la susdite induction de son aisné, pour leur estre fait droit ainsy qu’il appartiendroit, ladite requeste mise au sac par ordonnance de ladite Chambre, de ce jour.

Conclusions du procureur general du roy, consideré.

La Chambre faisant droit sur l’instance, a declaré et declare lesdits François et Pierre Le Tresle nobles et issus d’ancienne extraction noble et comme tels leur a permis et à leurs descendans en legitime mariage de prendre la qualité d’escuyer et les a maintenus au droit d’avoir armes et escussons timbrez appartenans à leur qualité, et à jouir de tous droicts, franchises, préeminences et privilleges attribuez aux nobles de cette province, a ordonné que leurs noms seront employez au roolle et catalogue des nobles de la jurisdiction royalle de Guerrande.

Fait en ladite Chambre à Rennes le deuxiesme mars mil six cens soixante neuf.

(Signé) Malescot.