[Au revers]

Rennes-Foulgeres

Adveu des chastellenies, baronnies, terres et seigneuries de Combourg, de Gauguenay, des fiefs Godeheust de Chasteaugiron, de Chasteaugiron et Amanlix et de Rougé, leurs appartenances et deppendances presenté par Jehan, seigneur de Derval, de Combourg, de Chasteaugiron, de Rougé et de S^t mars, le XIII^e jour de feuvrier an mil quatre cents soixante dix.

[folio]

Sachent tous que par notre court de Nantes s’est representé en personne devant nous, hault et puissant seigneur Jehan seigneur de Derval, de Combour, de Chasteaugiron, de Rogé et de Sainct Mars soy submectant et submect par son serment et tous ses biens presens et futurs quelxconques au povoir destroit et juridiction de notredicte court en tant que mestier est à tout le contenu en ces presentes lequel sire de Derval fut congnoessant et confessant et par ces presentes congnoest confesse et avoue estre homme du Duc notre souverain seigneur et de luy tenir prochement noblement ligement et à foy sans devoir de baill, rachat, ne chambellenaige soubs la barre et jurisdiction de Rennes sa baronnie et chastellanie de Combour savoir son chasteau forteresse et ville de Combour ovecques toutes et chacune les manoirs domaines et metaeries terres prés landes et deffays forestz hayes garainnes et autres boays anciens et taillables, drois de chasses mollins à eau et à vent à blés à draps et aultres molins estangs paescheries reffouls ataches de chaussées, rentes revenues par deniers vins pains blés chappons poullailles poyvre et pelices devoirs de guetz et reparations de doufves coustumes trepas marchés et foyres et guets de foyres fours à ban devoirs et droits de poys mesures de vins de grains et de sel bouteillages et mesuraiges de vins et aultres bevraiges devoirs de quintaynes des her… …ges et forfaictures espauves et galloyts ventes et landes messages prinses et port de cygnes hommes hommaiges juridictions revenues seigneuries et obeissances quelxconques que ledit sire a et luy appartiennent es parroisses de Combour Quebriac Tinteniac Dingé Sainct Leger Cuguen en laquelle parroisse dit ledit sire de Derval estre situé le chasteau et forteresse de la Roche de Montbourcher tenu de sadicte seigneurie de Combour et es parroisses de Plaine Fougere Charruées [Cherrueix ?] et la Bozac en laquelle parroisse a dit ledit sire estre situé le chasteau et forteresse de Landal et de luy tenu et aussi es parroisses de …. [1] Sainct Marquan Basoges soubs Hedé Saint Broularde Vieuxviel Sainct Onan Sainct Georges de Grehaingne Bonnemain Sandres Labbaye près Doul Sougeal Plerguets Traan Lanrigan et de Lormaye en chacune d’icelles parroisses ovecques les droits prouffits et honneurs que ledit sire a et luy appartiennent de fondations et de patronnaiges et abbaye de la Vieuville priourés de combour de l’abbaye près Doul et en aultres priourés chapellenies chapelles et aumosneries et tous autres honneurs revenues et droits heriteulx quelxconques que ledit sire a et luy appartiennent esdictes parroisses et chacune sans aucune chouse y retenir ne reserver sauff … les rentes et revenues terres et heritaiges honneurs hommaiges et jurisdictions que ledit sire a et luy appartiennent es fies bailliages tenues et masures cy après declerées en ladicte parroisse de Dingé savoir le fie et bailliage de Coebrac le fie et bailliage de Yllandieres le fie et bailliage de Noeant qu’elx il a reservés et ne les a confessés ne congnoest tenir du Duc prouchement par cause desquelles chouses cy davant confessées et avoués estre tenues du Duc il s’en doit et a acoustumé se debvoer à congié de personne et demener au tiers jour de la premiere sepmaine des plets generaulx de ladicte court de Rennes davant les senneschal ou alloué d’icelle pour luy et ses manieres et non autrement et y avons ses congés couvertures et retrouts pour luy et sesdicts maneans en maniere deue et acoustumée.

Mesmes fut confessant confesse et avoue ledit sire de Derval estre homme du Duc notredit souverain seigneur et de luy tenir noblement ligement et à foy par moyen et soubs sa jovignerie à cause de sa baronnie de Foulgeres, en la chestellanie et au siege de Basoges soubs ladicte barre et juridiction de Rennes sans aucun devoir de baill rachat ne chambellenaige savoir est les mannoir de Gaugueray estangs mollins reffouls prés boays garainnes gresnes salines paescheries marays rentes revenues juridiction seigneuries obeissances et autres droits heriteulx quelxconques nommés et apellés les fiefs Godeheust que ledit sire a et à luy appartiennent es parroisse de Ros sur Coesnon Paluau Sens [Feins ?] Manny Basoges la Perouse Noeal Meillac et en chacune d’icelles soubs ladicte seigneurie et chastellanie de Basoges.

Item congnoest confesse et avoue ledit sire de Derval estre homme du Duc notredit souverain seigneur et de ly tenir noblement prouchement ligement à foy rachat et chambellenaige sous ladicte barre de Rennes sa baronnie et chastellanie de Chasteaugiron et de Chasteaugiron et Amanlix savoir son chasteau et ville de Chasteaugiron ovecques tous les mannoirs domaines et mertaeries terres prés boays garaines et autres heritaiges rentes revenues moulins estangs reffouls paescheries hommes hommaiges proufits et honneurs de fondacions et patronages de priourés chapelles chapellanies et aulmosneries fies juridictions seigneuries et obeissances guets reparacions de doufves et tous autres droits seigneurieulx et heriteulx quelxconques que ledit seigneur de Derval a et luy appartiennent es parroisses de Chasteaugiron Donloup Novestou Noyal sur Villaigne Brecé Cervon Dommeigné Lovigné Oussé Sainct Aulbin du Pavaill Veneffle Amanlix Piré Janzé Letaill Tresbou Saulnieres Le Cyel Chanteloup Sainct Armel et Corpsnus et en chacune d’icelles parroisses à cause desdites baronnie chastellenie et seigneuries de Chasteaugiron et de Chasteaugiron et d’Amanlix sauff reservés et exceptés le moulin chaussée atache et refoul de Briend et le bailliage masure et tenue de la Pouchaye les ataches molins à blé et à draps de Tromton et les terres et mertaeries de Poligné le mannoir et mertaerie de Vauzelles les ataches et moulins à blé et à draps d’ esperon la coustume que prent et lieve ledit seigneur au pont esperon la metaerie des Motes Dorel et les devoirs et juridictions que luy doivent Tomyn et Guillaume les bonniers du villaige dudit pont esperon quelles chouses reservées et exceptées ledit seigneur de Derval ne confesse et n’avoue tenir prochement du Duc et se doit et a acoustumé ledit sire de Derval delivrer par cause des dictes chouses avouées tenues du Duc prochement à cause d’icelles seigneuries chastellanies de Chasteaugiron de Chasteaugiron et Amanlix au segond jour de la premiere sepmaine des plès generaulx de ladicte court de Rennes par davant les seneschal ou alloué d’icelle à congié de personne et de menée pour luy et ses maneants et non autrement et y avoir ses congés couvertures et retroits en manière acoustumée. Et que il est deu au Duc à cause desdites chouses foy lige hommaige rachap et chambellenaige touteffois et quantes que le cas en avient.

Mesmes congnoest et avoue ledit seigneur de Derval estre homme du Duc notre souverain seigneur et de luy tenir soubs sadicte barre et juridiction de Rennes noblement et prochement ligement à foy hommaige rachat et chambellenaige à cause de la chastellanie et seigneurie de Rougé appartiennent audit seigneur de Derval toutes et chacune les terres rentes revenues fies hommes hommaiges juridictions seigneuries obeissances et autres devoirs et droits heritreulx quelxconques que ledit seigneur de Derval a et luy appartiennent es parroisses de Janzé d’Erbecel et de Laleu sans aucune chose en reserves ne retenir et que par cause d’icelles chouses foy rachat et chambellenaige sont deus au Duc quant le cas y avient esquelles choses et chacune devant declerées de lui confessées et avouées tenir du Duc comme dit est tant à cause de Combour de Gaugueray et des fiefs Godeheust de Chasteaugiron de Chasteaugiron et Amanlix et de Rougé il avoue avoir et luy appartiennent justice patebulaire à quatre ponsts tout ferme droit droits de chastellanies et tous autres droits de justice et juridiction en haulte basse et moienne vayerie et confesse et congnoest estre tenu et devoir obeir à cause desdites chouses pour le Duc par sadicte barre de et court de Rennes comme homme lige doit pour son seigneur en la manière que dit est lequel present aveu et tenue ledit seigneur de Derval confesse estre vray et le fait o expresse reservation par lui faicte que si par inadvertance il obmectoit à bailler le tout de ce que il tient du Duc notredit souverain seigneur à cause d’icelles seigneuries de par autre temps le y emploier et ajouster et aussi s’il avoit emploié et mis en cedit present aveu aucune chose qui ne seroit tenue du Duc prochement comme dit est de l’en extroire en temps et en lieu que par raison ce devra estre et les chouses dessusdites et chacune ledit seigneur de Derval aprouves et jure par son serment tenir parfaire et acomplir soubs l’ypothecque et obligacion desdictes chouses et de chacune respectivement et de son assertement et par son serment sur ce fait luy condempnasmes et condempnons, donne tesmoign les feaulx establis es contracts de ma dicte court. Fait et octroyé au chasteau de Derval le treziesme jour de feuvrier l’an mil quatre cents saixante et dix. Constat en rasure : molins et en dampnure o la pleinne de la Pouchaye que nous aprouvons donné comme dessus, et ceste grosse estripte de la main de René Bourgneuff.

[Signatures :] Jehan Le Clerc passe [avec paraphe]

Demeastre passe [avec paraphe]