Du 14 novembre 1668.

Copié sur l’original en parchemin.

Extraict des registres de la chambre establye par le roy pour la refformation de la noblesse du pais et duché de Bretagne, par lettres patentes de Sa Majesté du mois de janvier dernier, veriffiées en Parlement.

Entre le procureur general du roy, demendeur, d’une part, et François du Vauferrier, escuier, sieur du dict lieu, cheff de nom et d’armes, et Louis du Vauferrier, escuier, sieur de la Basardaine, deffandeurs, d’autre part.

Veu par ladicte chambre :

Actes de comparution faictes par lesdicts du Vauferrier au greffe de ladicte chambre, le vingt quatriesme septembre mil six cents soixante huict, signées J. Le Clavier, greffier.

La premiere portant la declaration du dict François du Vauferrier de soustenir la quallitté d’escuier, comme estant d’extraction noble et ses predecesseurs l’ayant prinse, mesme celle de messire et de chevallier, et en estre cheff de nom et d’armes, quy sont d’or plain, au cheff de sable ; et la seconde, celle du dict Louis du Vauferrier, de la quallitté d’escuier par luy et ses predecesseurs prise, suivant les tiltres qu’il produira avecq le sieur du Vauferrier, aisné de la maison, et qu’ils portent pour armes un escusson d’or plain, au cheff de sable, chargé de trois coquilles d’argent, comme juveigneur d’aisné.

Un extraict du papier baptismal de la parroisse [folio 2v] de Sainct-Maugand, par lequel ce void que escuier François, fils de messire François de Vauferier et de dame Renée de Vauferrier, sa compaigne, seigneur et dame du dict lieu de Vauferrier, nacquict le jour sainct François, le deuziesme avril mil six cents trante six, et qu’il fut baptisé le dix neufiesme mars mil six cents trante neuf, ledict extraict signé Louis Le Tanneux, recteur du dict Sainct Maugand.

Actes de tuttelle faict par la jurisdiction du compté de Montfort, des enfents mineurs de messire François de Vauferrier, sieur du dict lieu, et de dame Renée du Vauferrier, sa femme, François, Françoise du Vauferrier et autres qui n’estoient encore nommé, ledict acte datté du vingt deuxiesme janvier mil six cents quarante un, signé M. Hindré, commis au greffe.

D’or au chef de sable.

Acte de prisage des maisons, terres, fieffes et autres biens mobilliers de la succession de deffuncts messire François de Vauferrier, vivant seigneur du dict lieu, faict entre messire François du Vauferrier, son fils aisné et principal herittier et noble, et damoiselle Françoise du Vauferrier, sa puisnée, ledict acte datté du premier septembre mil six cents soixante six, signé Marquer.

Adveu et minu de la maison, manoir, bois antiens de hautte fustais, galois, garennes, terres, herittages arrables et non arrables, fiefs, rentes et jurisdictions, pond, parages, seigneurie du Vauferrier, soubs la compté de Montfort, rendu par messire François du Vauferrier, seigneur du Vauferrier, [folio 3] debvoir de foy, hommage, sans rachapt ny chambelenaige, à très hault et très illustre et puissant prince, son seigneur Henry, duc de la Trimouille et de Thouarts, paire de France, prince de Talmont, compte de Montfort et autres lieux. Ledict adveu du douziesme novembre mil six cents trente un, signé du Vauferrier, J. Rolland, nottaires.

Acte de declaration faitte par messire François du Vauferrier, sieur du dict lieu, donnée au senechal de Rennes, commissaire pour la convocation du ban et arriere ban de cette province, de ce qu’il possedoict sadicte maison du Vauferrier, en datte du premier novembre mil six cent trante six, signé de Vauferier et Hindré, nottaire, avecq l’acte de reception d’icelle estant au pied, du quatriesme desdicts mois et an, signée Odye.

Extraict du papier batismal de la parroisse de Sainct-Maugand, dans lequel se void que le traiziesme juillet mil cinq cents quatre vingt un nasquict François du Vauferrier, fils de nobles gens escuier Nicolas du Vauferrier et de damoiselle Renée Piedevache, sieur et dame du dict lieu de Sainct Maugan. Ledict extraict signé Le Tanneux, recteur.

Deux adveus rendus à Nicollas du Vauferrier, seigneur du dict lieu et de la Brouce, par les y desnommés, le vingt troiziesme mars mile cinq [folio 3v] cents soixante douze et unziesme juin mil cinq cents quatre vingt un, signé Ollive, Garcin et de la Hais, Pellet, Le Roux.

Mandemant donné par Nicollas de Vauferrier, seigneur du dict lieu et de la Brouce, à son très cher et bien amé maistre Pierre de la Hais, seigneur de la Pilnerdiere, de l’office de senechal de la jurisdiction et seigneurie de Vauferrier, le premier may mil cinq cents soixante traize, signé du Vauferrier.

Acte de tutelle des enffents mineurs de feus nobles gens Nicollas du Vauferrier et de damoiselle Renée Piedevache, dans laquelle se void que tous les parants estoient personne de quallités. Ledict acte du dixiesme juillet mil cinq cents quatre vingt sept, signé Boret, greffier.

Deux adveus rendus à Jullien du Vauferrier, escuier, sieur de Vauferrier, par les y desnommés, les quinziesme may mil cinq cents cinquante et quinziesme juin audict an, signés Pillet et Gaultier.

Adveu rendu au roy par Jehan de Vauferrier, escuier, sieur du Vauferrier et de la Brouce, des terres qu’il possedoict soubs le ressort de Rennes, le vingt deuxiesme mars mil cinq cents trante neuf, signé Pillet, passé, et Grasin.

Sentence rendue par les commissaires ordonnée par le roy et monsieur le Dauphin, duc de Bretagne, pour la reformation generalle desdictes eaux et forests du dict pays et duché, rendu sur [folio 4] les tiltres et enseignements produicts par nobles gents Jehan du Vauferrier, escuier, sieur du dict lieu et de la Brouce, par laquelle est ordonné qu’il aura et jouira du droict, usage de paische en la ripviere du Maine [1], en l’endroict des terres, domaines et fiefs de Vauferrier. Ladicte ordonnance du vingt ugniesme juillet mil cinq cents quarante deux, signée Cleret, commis pour le greffe, et scellé d’un seau de sire rouge, sur lequel imprimé les armes du roy, de monsieur le Dauphin et de Bretagne.

Adveu rendu à noble homme Jan du Vauferrier, escuier, sieur du dict lieu, au nom et comme tutteur et garde naturel de escuier Jullien du Vauferrier, son fils, escuier, et damoiselle Marie du Chastellier, en leur temps sieur et dame du Vauferrier, ses pere et mere.

Un acte d’asiept faicte par noble gens messire Jan du Vauferrier, chevallier, sieur du Vauferrier et de la Beauce, à nobles gens Flemondas Pollet et Perrine du Vauferrier, sa femme et compaigne, le douziesme décembre mil quattre cents quatre vingt neuf, signé du Vauferrier, Voirest et Jehan Cojalleu, passé.

Acte de transaction et partage faict au noble comme au noble, entre nobles gens Guillaume de la Morinnais et Honneur du Vauferrier, sa femme compaigne, et noble escuier Regnault du Vauferier, sieur du Vauferrier, frere de la dicte Honneur sa sœur, enfentz de feu messire Jehan du Vauferrier et de dame Renée Le Brun, en leur vivant sieur et dame du Vauferrier et des Chemans, dans lequel [folio 4v] le dict Rolland [2] est raporté leur herittier principal et noble. Le dict acte datté du dixneufiesme juin mil quatre cents quatre vingt sept, signé de Pont Jehan, passé.

Acte de transaction passée entre Guillaume Mouasan, sieur de Pirouet, Roullet-Mouesan et autres lieux, et Jehanne du Vauferrier, sa femme, et messire Jehan du Vauferrier, chevallier, seigneur du dict lieu du Vauferrier, pere de ladicte Janne, le sixiesme janvier mil quatre cents quatre vingt un, signée Ollivier Gratonne, passé, Morice, passe, et de la Bouessiere, passe.

Acte de transaction passée entre nobles escuiers Jehan, seigneur du Vauferrier, d’une part, et Jehan, seigneur de la Basardaine, d’autre, sur le debat des preminences de l’eglise de Sainct-Maugand, que le dict seigneur du Vauferier pretendoict avoir seul, comme fondatteur et seigneur universel d’icelle, et sur ce que ledict seigneur de la Bossardaine pretendoict avoir une tombe en ladicte esglise, comme juveigneur de la dicte maison du Vauferrier, laquelle luy fut acordée. Dans laquelle transaction est faict mention que le dict seigneur du Vauferrier a en sa dicte seigneurie droict de quintaine, bouhour, d’esfeu, de paulme sur les nouveaux mariés. Ledict acte datté du traiziesme septembre mil quatre cents cinquante cinq, signé Guischart, passé.

Acte de transaction passée entre noble homme messire Jehan du Vauferrier et Pierre de Mars, le vingt septiesme decembre mil quatre cents [folio 5] quarente un. Signé Gilles Josses, passé.

Acte de partage faict au noble comme au noble et au partable comme au partable, entre Guillaume du Vauferrier, fils aisné et herittier principal de Jehan du Vauferrier, et de Mehault sa femme, d’une part, et Thibault de Launay et Anne sa femme, sœur du dict Guillaume, fille des dicts Jehan et Mehaut. Le dict partage datté du sixiesme septembre mil trois cents soixante dix sept, signé passé Perot et Paulmier.

Quatre actes d’adveus rendus aux seigneurs de Vauferier par Jan Mannayssiy, Villeroux, François Regnier, noble escuier Ollivier de la Barre et Alliennette de la Provosté sa femme, seigneur et dame de la Coulombiere, et noble escuier Amaury Boisteavere [3], seigneur de la Pisnellais. Lesdicts adveus rendus en juveigneurye les vingt uniesme octobre mil cinq cent trante trois, vingt sixiesme juillet mil cinq cents trante quatre, dix neufiesme may mil quatre cents cinquante quatre et quiziesme décembre mil quatre cents huict, signés et garentis.

Induction des actes et pieces cy dessus fournye par François du Vauferrier, sieur du Vauferrier, fils aisné, herittier principal et noble de deffunct messire François du Vauferrier, vivant seigneur du Vauferrier, et de dame Renée du Vauferrier, sa mere encore vivante, deffendeur, signiffiée au dict procureur general du roy le vingt cinquiesme octobre mil [folio 5v] six cents soixante huict tendente à ce que le dict deffendeur soict maintenu en ladicte quallitté de noble luy et ses predecesseurs s’estants gouvernés noblement, ayant pris la quallittés d’escuiers, messires et chevalliers, c’est pourquoy il suploict la Chambre de le maintenir a prendre l’advenir la mesme quallitté de messire et chevallier, qu’il luy soict permis de porter armes timbres et de jouir des privileges qu’ont tous les autres nobles de la province, avecq deffences de l’y troubler, sur les paines quy y eschent, et qu’à cette fin il sera inscrit au cathologue des autres nobles de l’evesché de sainct Malo soubs le ressort du presidial de Rennes. Ladicte induction signée F. du Vauferrier et Chupeau, procureur, et en la signification Testart.

Acte de partage noble faict entre messire Louis du Vauferrier, seigneur de la Bassardaine, et y [demeur]ant [4], paroisse de Sainct-[Maudan], d’une part, et mess[ire Christophle] Juchault, seigneur [de la Grand-]Noe, asisté et [authorisé en] tant que besoing de messire Louis de la Bourdonnais, seigneur vicompte de Couetion, conseiller du roy en sa cour de parlement de Bretagne, et autres proches parants, veuf de deffuncte dame Gabrielle du Vauferrier, pour la part quy apartenoict a ses enfents dans les successions de deffunct messire Jan du Vauferrier, seigneur de la Bassardaine, et de deffuncte damoisselle [folio 6] Françoise [de] la Hais, pere et mere __*__ des dicts Louis et [Gabrielle] du Vauferrier. [Le dict] acte datté du quinziesme novembre mil six cents cinquente huict, signé Beru et Germond, nottaires royaux à Mentes [5].

Contract de mariage du dict Louis du Vauferrier, seigneur de la Bassardaine, fils aisné herittier principal et noble de feu messire Jan du Vauferrier et presomptiff de dame Françoise de la Hays, seigneur et dame de la Bassardaine, ses pere et mere, avecq damoiselle Renée de la Bintinais, fille puisnée de messire Ren[é de] la Bintinais et de de[functe] dame Françoise de Volla[nt, seigneur] et dame de [la Grignonnais,] datté du douziesme __*__ six cents cinquante un, signé Mahé et Bertelot, nottaires roiaux à Rennes.

Autre contract de mariage de escuier Jan du Vauferrier, sieur de la Bassardaine et Françoise de la Hais, fille d’escuier Vincent de la Hays et de deffuncte damoiselle Françoise de Fresnais, en son vivant dame de Quenhouet, datté du vingt troisiesme avril mil six cents vingt sept signé [Jan du] Vauferrier et Françoise [de la Hais] et Callouenec __*__.

Decret de mariage faict en justice d’escuier René du Vauferrier, sieur de la Bassardaine, avecq damoiselle Louise de la Lande, dame de Quihac, le treziesme febvrier mil cinq cents quatre, [folio 6v] signé du Bois, greffier.

Partage donné par escuier Jan du Vauferrier, seigneur de la Bassardaine et de la Couasplain, et damoiselle Louise de la Lande, dame douariere de la Bassardaine, veufve de feu escuier René du Vauferrier, seigneur de la Bassardaine et de Couasplain, ses pere et mere, damoiselle Gabrielle du Vauferrier, femme de noble homme escuier René Bonnier, seigneur du Bois Hamon, le neufiesme janvier mil six cents vingt huict, dans lequel acte ledict Jan est qualifié fils aisné, principal et noble desdicts René du Vauferrier. Ledict acte signé de Thomas.

Autre acte de partage donné par le dict messire Jan du Vauferrier, seigneur de la Bassardaine, damoiselle Renée de Montferrier [6], espouse de messire François du Vauferrier, et de Jan herittier principal de messire René du Vauferrier et dame Louise de la Lande, sa compaigne, vivants sieur et dame de la Bassardaine, leur pere et mere communs. Ledict acte datté du dix huictiesme novembre mil six cents trante deux, signé Regnier, nottaire royal.

Trois exploicts judiciels rendus en la jurisdiction de Montfort les troiziesme juin, sept et dixiesme juillet mil cinq cents quatre vingt un signés Broze.

Le premier portant la majoritté de René du Vauferier, escuier, sieur de la Bassardaine.

Les second et troiziesme portant la declaration [folio 7] de damoiselle Magdelaine du Boifglé, mere et procuratrice de escuier René du Vauferrier, sieur de la la sucession de feu Jan du Vauferrier, son pere.

D’or au chef de sable chargé de trois coquilles d’argent.

Trois passeports et declarations données par les sieurs duc de Mercœur et de Montpentier et marquis de Couasquen, capitaine de cinquantes hommes d’armes, lieutenant pour Sa Majesté en Bretagne, à René du Vauferrier, sieur de la Bassardaine, les cinquiesme novembre et sixiesme decembre mil cinq cent quatre vingt douze et douziesme may mil cinq cent quatre vingt treze, signés Henry de Bourbon et plus bas, par mondict seigneur Brasser, scellé Emanuel de Loraine, et plus bas par mondict seigneur Morin, scellé, et de Couasquen, Dannerse, et scellé, portant la reconnoissance que le dict sieur de la Bassardaine avoit bien servy le roy et permission de se retirer avecq deux gents à cheval, mesme de demeurer en toutte surté en sa maison de la Bassardainc et autres lieux et d’y avoir six soldats pour la surté de sa personne avecq deffences de leur malfaire, ny mesdire ni prendre aucune chose en leur pocesions ny de leurs fermiers ou domainniers, sur paine de punition exemplaire.

Acte de transaction et partage donné par Jan du Vauferrier, escuier, sieur de la Bassardaine, à Jan du Vauferier, escuier, sieur de Couasplain, senechal de Dol, dans la sucession de deffuncts nobles gents Jan du Vauferrier et Françoise de Bellenan, vivant sieur de la Bassardaine et de Couasplain, [folio 7v] leur pere et mere, dans lequel est raporté la dicte sucession estre noble et advantageuse et les personnes de gouvernement noble et advantageux, et les predecesseurs desdictes partyes s’estre de tous temps immemorial gouvernés selon l’asise du compte Geffroy. Ledict acte datté du premier septembre mil cinq cents quatre vingt huict, signé du Vauferrier, Jan d’Argentré, de la Hais et Hattes, nottaires.

Declaration de François de Monterfil, seigneur de Monterfil, chevalier de l’ordre du roy et gentilhomme ordinaire de sa Chambre, commis de par monsieur de Bougle, gouverneur et lieutenant pour ledict seigneur roy en sa duché de Bretagne à la garde du chasteau de Comper, de ce que escuier Jan du Vauferrier, sieur de la Bassardaine, l’un des gentilshommes arquebusiers à cheval, subjet à l’arriere ban de l’evesché de Sainct-Malo, estoict retenu pour la garde du chasteau de Comper, dattée du deuxiesme aoust mil cinq cents soixante neuf, signé de Monterfil, et scellé.

Contract de mariage de Jan du Vauferrier, escuier, sieur de la Bassardaine et de Couaplain, et damoiselle Françoise de Bellouan, [fille de Jean de Bellouan, escuier, sieur de Bellouan [7],] du Val et de Banjouan, et de feue damoiselle Jehanne de Sainct-Gilles, sa compaigne, datté du vingt huictiesme avril mil cinq cents trante huict, signé de Bellouan, passe, et Orain, passé.

Acte de transaction passée entre damoiselle Françoise de Blouan, dame de Clerice, tant en son non que tutrixe de Jan du Vauferrier, sieur de la [folio 8] Bassardaine, son fils du mariage d’elle et de deffunct Jehan du Vauferrier son feu mary et damoiselle Marie de Cloust [8], dame de Rediliac, tant en son nom que comme tutrixe de Rolland Huchet, son fils aisné du mariage d’elle et de deffunct maistre Jehan Huchet, en son vivant sieur de la Bedoiere, le dix septiesme janvier mil cinq cents cinquante deux, signée du Bois, marque, et Ju. de la Morinais, dans laquelle transaction est refféré un contract de mariage de noble homme Rolland du Vauferrier en son vivant sieur de la Bassardaine, et damoiselle Bertranne Huchet, fille de noble homme Raoul Huchet et Charlotte de Cahideuc, sa femme, sieur et dame de la Bedoiere.

Autre acte de transaction passée entre damoiselle Françoise Levesque, dame de la Bouexiere, lors veufve de Rolland de Vauferrier, escuier, en son temps sieur de la Bassardaine, d’une part, et Jehan du Vauferier, sieur du dict lieu de la Basardaine, fils et herittier principal et noble du dict feu Rolland du Vauferrier, d’autre, le vingtiesme juillet mil cinq cents quarante quatre, signée Jac. de la Mouffais, du Vauferier, de Sainct-Brieuc, du Chet, du Boismarquer et Le Bouteiller, passés.

Contract de mariage d’entre nobles gens Jehan du Vauferrier, sieur de la Bassardaine, de sa part, et Jehanne Leonnois, fille seconde de noble homme messire Guillaume Le Leonnois, chevallier, sieur de Ponthay et de la Houssais, du quatriesme aoust [folio 8v] mil quatre cents soixante deux, signé Jehan Joffe, passé, et du Boismarquer, passé.

Acte de transaction passée entre noble et puissant François de Sainct-Amadour, chevalier, et dame Mathurine Lyonnois, sa compaigne, signé Lezot.

Acte de transaction du dix neufiesme juin mil cinq cents dix sept faict entre venerable et discrept maistre Guy Le Lionnois, abbé commendataire de l’abaye et benoist moustier de Nostre-Dame de Beaulieu et le couvant de ladicte abaye, d’une part, et Guillaume Joffe, Gilles Bertelemé et autres, dans lequel acte ce void que maistre Guy du Vauferier estoict gentilhomme, issu et extraict de noble et anticque chevallerie, apartenant à plusieurs beannerais, bachelliers, chevalliers et escuiers du pais et duché, signé Pepin, passé, et de Sainct-Pern, passé.

Acte transaction passée entre Jehan du Vauferrier, escuier, sileur de la Basardaine, d’une part, et Jehan du Vauferrier, seigneur du dict lieu, touchant la pocession du droict de garenne prohibitive à tous gibiers et parchages prohibitive en la ripviere du Meue et eaux despendents de ses dicts fiefs, du quatorziesme janvier mil cinq cents quarante deux, signé de la Fleschais, passé, et J. du Boismarquer, passé.

Quatre adveus et tenues rendus aux seigneurs de la Bassardaine par leurs vassaux, dattés des unziesme janvier mil quatre cents trante six, vingt troiziesme febvrier mil quatre cents cinquante deux, vingt [folio 9] deuxiesme may mil quatre cents cinquante quatre et quinziesme septembre mil quatre cents quatre vingt un, signés et garentis.

Adveu rendu par ledict messire Louis du Vauferier, seigneur de la Basardaine, au seigneur duc de la Trimouille, en qualitté de compte de Montfort, datté du huictiesme juillet mil six cents cinquante un, signé Louis de Vauferier, Raffray et Marquer, nottaires, et en la reception Le Moyne, procureur fiscal de Montfort, et scellé.

Induction dans laquelle est emploiée les cy dessus fournies par ledict Louis du Vauferrier, escuier, sieur de la Basardaine, deffandeur, signiffié au dict procureur général du roy, le vingt cinquesme octobre mil six cents soixante huict, tendante à ce qu’il pleust à la dicte chambre le maintenir en la quallitté de noble d’extraction, comme ses predecesseurs l’ayant tousjours prise et vescu noblement en leur gouvernement tel aux fins des actes qu’il a produict et qu’il luy sera permis de prendre la quallitté de messire et d’escuier, et à jouir de tous les privileges atribués aux personnes nobles, et estre inscripts au roolles d’iceux.

Conclusions du dict procureur général du roy, et tout ce que par devers ladicte chambre a esté mis et produict, murement considéré,

La Chambre, faisant droict sur l’instance, a declaré et declare lesdicts François et Louis du Vauferrier nobles et issus d’entienne extraction noble, et comme tels leur a permis et à leurs descendants en mariage legitime de prendre la quallitté d’escuiers [folio 9v] et chevalliers, et les a maintenus aux droits d’avoir armes et escussons timbrés apartenants à leurs quallittés, et à jouir de tous droicts, franchises, examptions, immunités, preminences et privileges atribués aux nobles de cette province, ordonné que leurs que leurs nomps seront emploiés au roolle et catologue des nobles de la senechaussée de Rennes.

Faict en ladicte chambre, à Rennes, le quatorziesme novembre mil six cents soixante huict.

(Signé) Malescot.