23^e may 1670, no 719 [1]

Monsieur d’Argouges, premier president,

Monsieur Denyau, rapporteur.

Entre le procureur general du roy, demandeur d’une part,

Et dame Françoise Le Gonidec, dame du Bois, demissionnaire de Pasquier Denys, sieur dudit lieu, son mary, demeurant à son manoir du Boys, parroisse de Sainct Gouesnou, evesché de Leon, soubz le ressort de Saint Renan et Brest, deffandeur, d’autre part [2].

Veu par la Chambre establye par le roy pour la refformation de la noblesse du pays et duché de Bretagne par lettres patantes de Sa Majesté du moys de janvier 1668 veriffiés en parlement le 30^e de juin ensuivant [3].

Un extraict de presentation faicte au greffe d’icelle par maitre Pierre Guybert, leur procureur, le 12^e octobre 1668, lequel aux fins de sa procure du 6^e dudit moys d’octobre 1668 auroit declaré pour ledit Denys voulloir soustenir la quallité d’escuier par luy et ses predecesseurs prise et porter pour armes d’or à deux faces d’azur ondés surmontées d’un pin aussy d’azur.

Induction d’actes et pieces de ladite dame Françoise Le Gonidec, dame du Boys, demissionnaire de Pasquier Denys, escuier, sieur du Boys, son mary, faisant tant pour luy que pour escuier Guillaume Denys, son fils aisné, Jacques et Jan Denys, ses cadets, soubz le singn dudit Guybert, fournye et signiffiée au procureur general du roy le 27^e may 1669 par Boullongne, huissier en la Cour, par laquelle il declare estre noble et issu d’antienne extraction noble, et comme tel debvoir estre et ses dessendans en legitime mariage maintenu en la quallité d’escuier pour jouir de tous les droicts, honneurs, franchises, preeminances et previllages attribués aux nobles de cette province, et en consequence que son nom sera employé au roolle et cathologue des nobles de la juridiction royalle de Sainct Renan et Brest.

D’or à trois fasces ondées d’azur, surmontées d’un pin de même.

Pour establir la justice desquelles conclusions, ledit deffendeur articulle à faicts de genealogye qu’il est fils aisné, heritier principal et noble de feu escuier Tanguy Denys, vivant sieur du Boys, et de damoiselle Marye de Launay, ses pere et mere, et que ledit Tanguy Denys estoit fils aisné, heritier principal et noble d’escuier François Denys et de damoiselle Renée Tulec [4] sa femme, vivant sieur et dame du Boys, ledit François pere dudit Tanguy estoit fils aisné, heritier principal et noble de feu escuier Jan Denys et de damoiselle Catherinne Gouzabas, fille aisnée de la maison de K/opas, sa compaigne, bisayeul et bizayeulle dudit Pasquier Denys, ledit Jan Denys estoit fils aisné, heritier principal et noble d’escuier Allain Denys, sieur du Boys, et de damoiselle Marye du Com, fille aisnée de la maison de K/engard, trisayeul et trisayeulle dudit Pasquier Denys, tous lesquels comme leurs predecesseurs se sont de tout temps imemorial gouvernés et comportés noblement et adventageussement tant en leurs personnes, biens, que partages, et ont tousjours pris et porté les quallités de nobles escuiers et seigneurs, ainsy justiffé par les actes certés aux indductions du deffendeur, par tout lesquels les quallités de nobles homs escuiers et seigneurs y sont employés.

Contredicts du procureur general du roy signiffié audit Guybert le 5^e juin 1669 par Frangeul huissier en la cour.

Coppye d’arrest du 27^e de juin audit an 1669 [folio 1v] rendu entre ledit procureur general du roy, demandeur, et ledit Pasquier Denys, escuier, sieur dudit lieu, deffendeur, par lequel ladite Chambre auroit ordonné avant faire droict en l‘instance dudit deffandeur qu’il justiffiroit plus amplement et par autres actes que ceux par luy produicts sa quallité et son gouvernemant noble et apparoisteroit les prisages mentionnés aux partages par luy produicts, le tout dans le moys, pour ce fait et communiqué au procureur general du roy, estre ordonné ce qu’il appartiendroit.

Nouvelle induction de dame Françoise Le Gonidec, dame du Boys, demissionnaire de Pasquier Denis, escuier, sieur du Boys, son mary, faisant tant pour luy que pour Guillaume Denys, leur fils aisné, Jacques et Jan Denys, leurs puisnez, deffendeurs, concluand à ce qu’il pleust à ladite Chambre leur adjuger les fins et conclusions par eux prises en leur premiere induction leur feussent adjugées, ce faisant estre maintenuz en la quallité d’escuier et de noble d’antienne extraction, armes et privilleges de noblesse et ordonne qu’ils seront employés au cathologue des nobles de ladite province soubz le ressort de ladite juridiction royalle de Sainct Renan et Brest, soubz le singn dudit Guybert, aussy fournye et signiffiée au procureur general du roy le 7^e de may 1670 par Dutac.

Autres contredictz dudit procureur general du roy signiffié audit Guybert le 14^e dudit moys de may audit an 1670 par Boullongne huissier.

Et tout ce que a esté mis et produict devers ladite Chambre, consideré.

Il sera dict que ladite Chambre, faisant diffinitivement droict sur lesdictes instances et execution d’arrest, a declaré et declare ledict Pasquier Denys noble et issu d’extraction noble, et comme tel luy a permis et à ses dessendans en mariage legitime de prendre la quallité d’escuier, et l’a maintenu au droict d’avoir armes et escussons timbrés appartenants à sa quallité et à jouir de tous droicts franchises preeminances et previllages attribués aux nobles de cette province, et ordonné que son nom sera employé au roolle et cathologue des nobles de la juridiction royalle de Sainct Renan et Brest.

Faict en ladite Chambre à Rennes, le 23^e de may 1670.

[Signé] d’Argouges, F. Denyau