Tudchentil

Les sources sur les gentilshommes bretons

Tréguier vue depuis les rives du Jaudy, rue du Port.
Photo A. de la Pinsonnais (2009).

Baronnie de la Hunaudaye

Jeudi 1er novembre 2007, texte saisi par Bertrand Yeurc’h.

Adhérez à Tudchentil !

Notice d'adhésion 2017 à Tudchentil, à remplir et à envoyer avec votre chèque au siège de l'association.

Catégories de l'article

Source

Dom Hyacinthe Morice, Preuves, t. III, col. 553-555.

Citer cet article

Dom Hyacinthe Morice, Preuves, t. III, col. 553-555, 2007, en ligne sur Tudchentil.org, consulté le 17 août 2017,
www.tudchentil.org/spip.php?article461.

François, par la grace de Dieu Duc de Bretaigne, Comte de Montfort, de Richemont, d’Estampes & de Vertus, à tous ceux qui ces présentes lettres verront ou orront, salut.

Comme à nous de nos droits souverains appartient & non à autre en nostre pays & Duché donner telle prééminence, honneur & avantages à nos vassaux & féaux sujets qu’il nous plaist, & entr’autres ayons vouloir & affection de le faire à ceux qui le valent & qui l’ont ien merité & deservi, & soit ainsi que nous cognoissans estre trés-expedient & convenable pour le bien, honneur & augmentation de nostre Principauté, Seigneurie & de la chose publique d’icelle, créer Barons, Bannerets, Bacherliers & Chevaliers pour assister avec nous à nos Estats & Parlemens géneraux & autres assemblées qu’il nous est requis faire pour déliberer des grands matieres & affaires de nous, nostredit pays & Duché & l’utilité du bïen public d’icelui, en quoi est besoin avoir les grands personnages & gens de grande puissance & faculté de biens, constituez en grans estat, honneur, dignité & Seigneurie de nostredit pays & Duché toutesfois & quantes pouvons vraisemblablement cognostre que le défaut desdites personnes requis en ce que dessus se trouve on peut trouver, nous soit permis & loisible faire, créer & augmenter esdites dignités & Seigneuries ceux que cognoissons qui la valent & en peuvent porter le feix & charge tant de leurs personnes que facultès : sçavoir faisons que nous en consideration de ce que dessus, mesme que plusieurs des Baronies de nostredit pays & Duché sont reduites & encore se peuvent reduire en un seul support & personnage, & entr’autres le Baronnie du Vicomte de Leon & celle de Fougieres qui à présent sont en nostre main ; autre sont vraisemblablement disposées à y tourner & eschoir ; sçavoir la Baronie de Quintin en la main de nostre trés-cher & trés-amé cousin & féal François de Laval Sire & Baron de la Rochebernard ; les Baronnies de Chasteaubrient, de Malestroit & de Derval ès mains de nostre trés-honoré & trés-amé cousin & féal François de Laval Seig. de Montafilant, & de nostre trés-chere & trés-amée cousine & féales Françoise de Rieux sa compagne, tant à cause de lui que d’elle, ou ès mains de leurs heoirs, successeurs ou cause ayant respectivement, au moyen de quoi en l’avenir l’honneur de nous & de nosdits Etats, Parlemens generaux & assemblées, qui anciennement & de tout temps ont accoutumez estre ournez & décorez de plusieurs & grand nombre de Prelats, Barons, Bannerets, Bacheliers, Chevaliers & Escuyers, & le bien de la chose publique de nostredit pays pourroient estre diminuez & nous moins bien conseillé & servi, & les affaires de nostredit pays pirement traitées au grand dommage & préjudice de nous & de toute la chose publique de nostredit pays & Duché :

Nous pour lesdites causes considerans les bons, loyaux, louables, agréables & recommandables services que par ci-devant ont faits à nos prédecesseurs Ducs & Princes de Bretagne, que Dieu absolve, & à nous mesme & à chacun en son temps les prédecesseurs de nostre trés-cher & trés-amé cousin le Sieur de la Hunaudaie, & aussi nostredit cousin de tout son temps & singulierement ceste présente année que le Roy a fait intelligence avec plusieurs & la pluspart des Barons & nobles, de nostredit pays & Duché ; nous a invadé & assailli à puissance d’armes & fait de guerre en nostredit pays, tendant à la totale destruction d’icelui, ne voulant ensuivre l’entreprise dudit Roi & sedition faite desdits Barons & nobles, à laquelle ils l’ont à toute leur puissance voulu persuader par dons & promesses, menaces, terreurs & espouvantes ; mais comme nostre bon é loyal vassal & sujet en ensuivant l’ordre de ses progeniteurs nous accompagner & servir à la défense de nostredit pays & Duché s’est toujours tenu avec nous durant ladite guerre & le siege, qui devant nous & nostre ville de Nantes a esté mis & assis par les François, en quoi il a employé corps & biens, & y a frayé & despensé de son bien en grande abondance & largesse, & en sa compagnie sont venuz & renduz en nostre service grand nombre des nobles & grands personnages de nostre pays & Duché & ensuivant nostredit cousin & le bon vouloir qu’il avoit à nostre service, lesquels nous ont bien & loyaument servi à la défense de notredit pays, & nostredit cousin, comme nostre Lieutenant général, réduit nostre ville, chasteau & forteresse de Moncontour, qui par lesdits François & leurs alliez avoit par subtils moyens esté prise, à nostre vraye & loyale subjection & obéissance, de quoi nostredit cousin a merité d’estre granbement reconnu de nous : considerant mesme que icelui nostre cousin est d’extraction, puissance & faculté de biens & richesses pour entretenir & maintenir l’estat & honneur requis à entretenement de Baron & Baronnie. Pour lesdites causes & autres à ce nous mouvans, avons de nostre autorité, pleniere puissance, propre mouvement & certaine science crée, & nommé, créons & nommons par cesdites présentes Barons en nostredit pays & Duché, sçavoir en premier lieu nostredit cousin de la Hunaudaie, du nom & titre dudit lieu & Seigneurie de la Hunaudaie, & en second lieu nostre cher & bien amé cousin le Sieur de Coetmen du nom & titre de Coetmen, aux droits, lieux, noblesses, rangs, assietes, privileges, honneurs & prérogatives appartenans à Baronnie & estat de Baron, tels & pareils que ont eu, ont & peuvent avoir les autres Barons de nostredit pays & Duché, voulans & voulons que d’iceux il & ses principaux heritiers & successeurs usent & jouissent à l’avenir tout ainsi que font, peuvent & ont accoutumé faire les autres Barons de nostredit pays & Duché ; car ainsi le voulons & nous plaist. Et pour ce que notredit cousin nous a dit & fait remonstrer, que à la création par nous derrainement faite desdits Barons & Baronnies de Quintin, Derval & Malestroit à nosd. Estats & Parlemens géneraux, feu ... Tournemine son pere s’y estoit opposé en préjudice qu’il n’eust son rang & assiete ou ses hoirs avant lesdits Estats & Parlemens géneraux & autres assemblées à la fin que nostre plaisir seroit le créer ou ses hoirs Barons pour ce qu’il disoit que de tout temps comme Banneret & l’un des grands Seigneurs de nostre pays il les préferoit ès dites assietes, de quoi lui avons reservé faire raison, & encore & présent le lui réservons à la foi que debat en adviendra. En tesmoins de tout ce & affin que ce soit chose ferme & fiable à durer & valoir en perpetuel, nous avons signé ces présentes de nostre main & fait sceller de nostre scel en laz de soie & cire verte.

Donné en nostre ville de Nantes le 6. jour de Septembre l’an 1487. ainsi signé, François. Et plus bas : Par le Duc, de son commandement & en son conseil, auquel l’Evesque de Nantes, le Comte de Comminges, le Sieur de Coetquen grand Maistre d’Hostel, le Sieur de Maupertuis Maistre de l’Artillerie, le Gouverneur de Monfort & plusieur autre estoient. Signé, G. Guenguen.